Seinasti dagurinn hjá Frisk

Í dag er seinasti dagurinn sem ég vinn hjá Frisk. Ég hef unnið þarna með smá hléum, auðvitað árs hléi seinast, síðan 2. apríl 1998. Maður er með svona ágætis starfsreynslu þaðan og ég hef prófað ýmislegt. Sumt af því sem ég hef gert þarna féll nú ekki alveg að upphaflegri starfslýsingu, en ég er sáttur. Það má alltaf deila um stjórnunaraðferðir, en þegar öllu er á botninn hvolft þá er þetta fjölskyldufyrirtæki og þarf ekki að svara til neinna en eigenda.
Ég vona að vinir mínir hjá Frisk muni njóta góðrar framtíðar annað hvort þarna eða annar staðar.

Jæja, þá er það komið.

Fór í gærkvöldi austur til Steig, Vík í Mýrdal og náði í Dísu og Alexander. Þau voru verulega spennt sem og ég. Það var gjörsamlega "geðveikt" að sjá þau aftur. Alexander er að safna hári og lítur núna út eins og Emil í Kattholti. Dísa er svo dugleg með svo skemmtilegar pælingar. Það veldur henni miklu hugarangri þessa dagana að peningar geti verið "búnir".
Á leiðinni heim úr sveitinni þá talaði Alexander allan tímann. Hann hafði frá svo mörgu að segja og þetta var fínt því að ég var verulega þreyttur og gott að hann hélt mér vakandi. Við komum ekki í bæinn fyrr en klukkan hálf 1 í nótt. Pabbi var búinn að útbúa dýnur fyrir þau og þau steinsofnuðu systkinin alveg búin.

Við getum aldrei þakkað Ásrúnu og Óla nóg fyrir aðstoðina sem þau hafa veitt okkur í allt sumar. Dísa og Alexander hafa fengið að vera þarna meira og minna síðan í maí, reyndar Alexander bara frá júnílokum. Það er ekki einfalt að taka við börnum í svona langan tíma og ég segi því: TAKK, TAKK elsku Ásrún og Óli. Ég vona að ég geti einhvern vegin borgað til baka.

Jæja, best að drífa sig í vinnuna. Í dag er eiginlega engin eldamennska. Við fáum Pizzur frá Dominos og köku úr Austurveri. Vesselin Bontchev, annar búlgarinn í Frisk, er að hætta eftir langan feril. Hann er reyndar ekki alveg hættur, en flytur til Búlgaríu og vinnur líklega þaðan.
Vess er alveg stórmerkilegur karl og byrjar flestar útskýringar á "It is not quite that simple" (lesist með dash af austur evrópskum hreim). Hann hefur sýnt eldamennsku minni áhuga og er alveg dolfallinn yfir hvítlaukssmjöri sem ég bjó til um daginn. Hann gaf mér svo uppskrift að búlgörskum chillirétt sem ég á eftir að prófa. Þessi maður er mjög hrifinn af sterkum mat og þá erum við ekki að tala um "mild" heldur verulega "hot". Inferno værir réttara orð yfir styrkleikann sem hann vill. Hann á sósu sem er svo sterk að maður notar 2 dropa í gallon (ca. 4 lítrar?) af vökva. 3 dropar eru of mikið. (hér er notast við almenna skilgreiningu á dropa. Þeir sem eru í vafa sendið póst á arnar.thor@gmail.com)

En Vess er ekki sá eini að hætta í dag. Ásta hættir líka. Hún hefur verið í bókhaldinu og staðið sig með sóma. Var ráðin í ákveðinn afmarkaðan hlut, en líkt og hjá mér hefur hún unnið með flest þarna í sölu og bókhaldsdeildinni. Ég held að það verði mikil eftirsjá í henni.

Jæja, nú verð ég að fara í vinnuna. Þakka þeim sem lásu.

kveðja,

Arnar Thor
Nú eru bara 6 dagar í Danmörk.